NAGA CITY – Gadan an duwang miembro kan Philippine National Police (PNP) sa nairehistrong engkwentro sa Camarines Sur kasubagong aga.
Sa nakuang impormasyon kan Bombo Radyo Naga napag-araman na pasado alas 5:00 nin aga kan makabakbakan kan Camarines Sur Provincial Mobile Force Company an kinakarkulong nasa 18 miembro kan mga rebeldeng New People’s Army sa Barangay Payak, Bato, Camarines Sur.
Naghaloy nin haros 20 minuto an riribayan nin putok kunsaen tinamaan an duwang pulis na nagmitsa sa saindang buhay.
Mientrastanto, sarong engkwentro man sa pagultanan kan tropa kan gobyerno asin mga NPA an nairehistro sa La Medalla, Tinambac, Camarines Sur.
Sa entrevista kan Bombo Radyo Naga ki Maj. Ricky Anthony Aguilar, chief kan Division of Public Affairs Office (DPAO) kan 9th Infantry Division, Philippine Army, sinaysay kaini na naghaloy nin limang minuto an riribayan nin putok kan mag-ibong na lado.
Narekober sa lugar an duwang M16 rifles mantang mayo man nin nairehistrong casualty.
Sa ngunian, nagpapadagos pa an clearing operation kan mga otoridad sa nasambitan ng mga lugar.
