Napuli sa dae mababa na 37 an mga binawian nin buhay sa banggaan kan duwang pampasaherong bus sa sarong highway sa southern part kan Bolivia, kabali digde an walong menor de edad.
Susog sa report kan pulisya ini na an pinakamalalang aksidente kan bus sa nasyon ngunyan na taon.
Mantang pigdara naman an 41 na mga irido sa ospital. Kabali pa sa mga binawian nin buhay an limang banyagang Peruvians asin man sarong 3 anyos na aking babaeng German. Pitong iba pang menor de edad an kabali sa mga nagadan.
Basado sa report kan mga otoridad nangyari an aksidente kan mag oomagahon oras sa Bolivia sa sarong sadit na aagihan mantang pasiring an biyahe kaini sa Oruro, na kun saen pigkundisir an Oruro Carnival.
Sigun sa prosecutor na si Gonzalo Aparicio an driver soboot kan saro sa mga bus ay nasa impluwensya nin arak asin marikas na nagmaneho rason tangani ini mag-overshoot sa ibong man na linya kan tinampo na naghantong sa makusog na salpukan sa papaabuton man na bus.
Tulos man na kinumpirmar man sarong ng opisyal na an saro sa mga nakasalbar na driver ay ‘parong arak’ kaya man nagsagibo an mga ini nin blood test.
Mientrastanto bistadong delikado an mga winding mountain roads sa Bolivia, kaya man an mga ini ay madalas na pinagpupuonan nin mga aksidente. Sigun sa datos kan gobyerno, an mga aksidente sa tinampo ay rason kan pagkagadan kan dae mababang numero na 1,400 katao taun-taon.
Susog pa sa report kan pulisya antes pa man an aksidente kan nakalihis na Sabado, may 64 na tao na an binawian nin buhay na may koneksyon pa sa sarong road accident sa lugar kan Potosi ngunyan na taon.
Sa sarong magkasuhay na insidente sa Bolivia, kun saen dae mababa man sa 30 katao an nagadan kan tumaob an sarong bus sa sarong 800-meter-deep ravine.
An insidente ay nangyari man sa sarong makitid na dalan sa pag ultanan kan mga siyudad kan Potosi asin Oruro, alagad dae naman pighali kan mga awtoridad na an rason kan mga aksidente an huli pa man sa marikas na pagmamaneho kan mga driver kan bus.
Kan nakalihis man na bulan kan Enero, saro pang aksidente an nagresulta sa pagkagadan kan 19 na katao kan lumihis an sarong bus gikan sa tinampo harani sa Potosi.
