Kinumpirmar kan Department of Foreign Affairs (DFA) na apat na mga barkong rehistrado sa Pilipinas an ligtas nang nakabalyo sa Strait of Hormuz paluwas sa Persian Gulf.
Segun sa DFA, salbado man an 81 na mga tripulanteng Pinoy na lunad kan MV Lyng Trader, MV Western Doncaster, MV Vivian Trader, asin MV Eva Fuji.
Sa ngonian, an kadaklan sa mga tripulante nakabalik na sa saindang regular na trabaho mantang an iba nagpili nang mag-uli sa saindang mga pamilya.
Mientrastanto, stranded pa man giraray sa rehiyon an nagkapirang mga Pinoy crew members kasunod kan pagsuspinde kan evacuation huli sa liwat na pagbangon kan tensyon sa pagultanan kan Iran asin Estados Unidos.
Padagos an pagbabantay kan DFA sa saindang mga sitwasyon asin inasegurar na gigibohon an gabos para sa saindang ligtas na pag-uli.
Mientrastanto, nagpatanid man an Philippine Embassy sa Kuwait sa mga kababayan kaini duman asin inabisuhan na maging alerto huli sa nagpapadagos na tensyon sa Middle East.
