NAGA CITY – Padagos an pag-imbestigar kan Bureau of Fire Protection-Pili mapadapit sa nangyaring kasulo kan nakalihis na aldaw, Mayo 27, 2025 sa banwaan nin Pili, Camarines Sur, kun saen 6 na kaharungan an nasulo.
Sa entrevista kan Bombo Radyo Naga ki Fire Senior Inspector Violerta F. Ramirez, RCrim, Municipal Fire Marshal Pili Fire Station, sinaysay kaini na nangyaring kasulo sa saindang lugar an tulos man na ipinaabot sa saindang hepatura kun saen tulos man na nagresponde an mga bombero.
Dugang pa kaini, nangyari an nasambitan ng kasulo sa Zone 2, Anayan sa nasambitan ng banwaan asin 6 na kaharongan an nadamay na igwang man 9 na pamilya an apektado. Katakod digde, nagdurar an fire fighting operation nin 20 minutos kun saen apat na fire truck an nagtarabangan na magtumtom kan kalayo, kaibahan na an truck kan provincial government kan Camarines Sur.
Sigun pa ki Ramirez, an mga nadamay na kaharongan an gibo sa light materials kaya marekas soboot naglakop asin nagdakula an kalayo.
Mientrastanto, mayo man naikurit na casualty sa nasambitan ng insidente, alagad sa ngunyan nasa irarom pa nin imbestigasyon kun pira an kabilogang kantidad kan danyos, siring man kun mabase soboot sa saindang estimate sa floor area mapakol sa P18,000 an estimated damage digde.
Pigtawan-duon pa kan opisyal na madepende sinda sa actual damage kan kasulo kun matao nin affidavit of loss an mga nasuloan huli man ta sinda soboot an nakakaaram kun ano an mga natupok na gamit.
Sa ngunyan, pagiromdom na sana ni Ramirez sa publiko na likayan an paggamit nin mga substandard na wires, asin an octopus connection, siring man bantayan soboot an mga kaakian na nagkakawat nin posporo asin lighter.
Siring man, bantayan an mga pigluluto asin dae pagpabayaan, magin kun mahali sa harong siertuhon na nakaharali an mga saksak kan appliance tanganing malikayan an siring na mga kasulo.
