NAGA CITY – Nagpaparahay pa sa ospital an anom sa labi 30 mga pasahero kan truck na naaksidente sa San Fernando Camarines Sur mantang nagtitinir na 13 an nairehistrong gadan.
Sa entrevista kan Bombo Radyo Naga ki P/CMSgt.Victor Quinao, imbestigador kan San Fernando-PNP, sinaysay kaini na nakaluwas na sa ospital an nagkapira sa mga nairidong pasahero alagad mabwelta sinda sa lugar kan pinangyarihan para ipagpadagos an imbestigasyon.
Sa ngunian, dae pa masusog kan mga otoridad kung siisay an nobyo kan biktimang si Bea Lucilo, 15-anyos na nakabale sa mga nagadan.
Marurumduman na nagpresentar an mga biktima sa harong ni Bea sa Barangay Gñaran asin papuli na kuta na an mga ini sa Barangay San Joaquin sa parehong probinsya alagad pag-abot sa pababang parte kan Barangay Tagpocol kan nawaran nin preno an lunadan na napuli sa pagkagadan kan 13 katao mantang iridu an labi sa 30 iba pa.
Mientrastanto, nagtao naman nin tabang an lokal na gobyerno kan San Fernando sa mga biktima kan aksidente.
Napag-araman na pagsasadiri kan LGU-San Fernando an truck mantang empleyado man an nagmaneho kan lunadan.
Sa ngunian, sigon ki Quinao, enkaso magsunad nin reklamo an pamilya kan mga biktima, suruon suon na kaso an posibleng kahampangon kan driver kan lunadan na maswerteng nakasalbar sa aksidente.
