NAGA CITY- Pigkakarkulong nag-abot suboot sa labi sa 2 milyon na mga deboto an nagpasiring sa pilgrimage site na Kamay ni Hesus na makukua sa barangay Tinamnan sa banwaan nin Lucban sa probinsya nin Quezon kan nakaaging Semana Santa.
Sa entrevista kan Bombo Radyo Naga ki Edwin Datur hale sa Municipal Disaster Risk Reduction and Management Office (MDRRMO) Lucban, nagbulos suboot an mga deboto na hale pa sa manlaen laeng lugar kan Huwebes Santo kasabay kan pigkondusir na Alay Lakad sa lugar.
Hasta suodma, kadakol pa suboot an mga deboto na nagpasiring sa nasambitang pilgrimage site.
Sa ibong man kan milyon-milyong mga deboto na nagpasiring sa lugar, sigon ki Datur, mayo man nairehistrong anuman na krimen an mga otoridad asin kadiit sana suboot an mga basura na pigwalat kan mga pilgrims.
Mientrastanto, sigon sa opisyal, apwera sa mga nagbisita sa Kamay ni Hesus, nagbulos man an mga deboto na nakisumaro sa taunang ‘Buhusan’ Festival sa kasentrohan kan Lucban na pigkondusir kasabay kan Easter Sunday.
An ‘Buhusan’ festival suboot hale sa tataramong ‘Buhos’ asin ‘Saya’ kun saen nag-uugma an mga tao mantang pigbabasa an mga ini nin tubig siring kan saindang pag-uugma sa liwat na pagkabuhay ni Hesus.
