Nag atubang sa korte si dating South Korean president Yoon Suk Yeol kan nakalihis na aldaw nin Lunes, Abril 14, para sa primerong aldaw kan saiyang kasong kriminal katakod kan insurrection chrages makalihis an kontrobersyal na deklarasyon kaini nin martial law kan nakalihis na Disyembre.
Si Yoon an na-impeach asin man pighali sa puwesto Kan mga lehislador ngunyan sanang bulan, makalihis kaining porbaran na ipautob an martial law kan Disyembre 3.
Nagpadara soboot ini nin mga suldafos sa National Assembly sa tangkang pugulan an lehislatura. Ini an primerong nakatukaw na presidente kan South Korea na inarestar mantang nasa puwesto, bagaman paramientras pinalibre ini huli sa procedural issues.
Sa pagbubukas lan paglilitis sa Seoul Central District Court, pighapot si Yoon kan mga hukom dapit sa saiyang personal na impormasyon.
Aapudon kan korte an duwang military officers komo saksi, kabali an sarong opisyal na nagsabing pigsugo sa sainda kan halangkaw na opisyal an pagsugod sa mga lehislador tangani ipautob an martial law.
Nagkasararo an mga lehislador na tutulan an deklarasyon ni Yoon.
Sa ibong kan presensiya kan mga suldados, lumusot sinda sa mga ulang kan parliyamento tangani bumoto asin man ibasura an martial law, rason tangani umatras si Yoon makalihis sana an pirang oras.
Sigun sa legal experts, posible na abuton nin pirang bulan an paglilitis, orog na ta igwa nin pigkakarkulong 70,000 dahon nin mga ebidensya asin kadakol na testigo.
Sigun sa abogado na si Min Kyoung-sic, posibleng iluwas an primerong hatol sa Agosto, alagad posibleng maglaba pa ini depende sa proseso kan paglilitis.
Enkaso man napatotoohan na may sala, si Yoon an magigin ikatulong presidente kan South Korea na mahahatulan huli sa insurrection—kasunod kan duwang dating military leaders na imbwelto sa 1979 coup.
An padusa sa kasong ini an habambuhay na pagkakakarsel o kagadanan, alagad dae piglalaoman na ipapautob an death penalty huli man sa umiiral na moratorium sa mga bitay sa South Korea magpuon pa kan nakalihis na taong 1997.
