Alagad maski pinahimutikan kan China an mga akusasyon na dae sinda nanghihimasok sa nagdadangadang na May 2025 midterm elections, pigtawan-duon ni Senate Committee on National Defense Chairman Senador Jinggoy Estrada na dapat magsagibo an mga kinauukulang ahensiya kan gobyerno nin hararom na imbestigasyon mapadapit digde.
Sinaysay ni Estrada, apwera sa pagsasagibo nin imbestigasyon, kinakaipuhan pasimbagon an sisay man na nagporbar na impluwensiyahan an demoktratikong proseso kan Pilipinas, sinda man an dayuhan o local collaborators.
Dugang pa ni Estrada, anumang potensiyal na huma sa seguridad asin panghihimasok kan dayuhan sa eleksiyon sa Mayo 12 an sarong seryosong pagbalgar sa pambansang soberanta asin sa integridad kan sistema sa eleksiyon.
Dapat pangatamanan soboot an kabanalan kan balota sa gabos na pagkakataon. Kun marurumduman, pigkompirmar kan National Security Council (NSC) na igwang mga indikasyon na nanghihimasok an China para sa nagdadangadang na May 2025 National and Local elections.
Sa pagdangog kan Senate Special Committee on Maritime and Admiralty Zones, sinaysay ni National Security Council Assistant Director General Jonathan Malaya na igwang operasyon na piggibo an Chinese state-sponsored sa Pilipinas kun saen nakikiaram ini tanganing manggana an mga kandidato na nagsusuporta sa China asin rauton an mga kandidatong nagtutuligsa sa sainda.
Sinaysay man ni Senador Francis Tolentino, an mga siring na aktibidad an dae tulos naiintindihan kan publiko huli soboot ta nakasalak na ini sa social media.
Bagay na kinatigan man ni Malaya. Pighalimbawa ni Malaya na nahihiling ninda na kadakol naratibo na nagluluwas gikan sa China na pigpapakusog kan saindang local proxy digde sa nasyon.
Igwang pigpapaluwas soboot na pahayag an Beijing na pareho man an pigsaysay kan local proxy sa Pilipinas.
Pighalimbawa pa kan opisyal an pigsasagibong Balikatan exercises ngunyan sa Pilipinas kun saen igwang mga pahayag na gikan sa China – na ini soboot sarong huma sa regional peace and stability kan Pilipinas kun saen aarugon sana kan mga local proxies.
