NAGA CITY- Bukas sa publiko an mga programang pansalud kan City Population and Nutrition Office sa siyudad nin Naga.
Sa entrevista kan Bombo Radyo Naga ki Joy Felix Macaraig kan City Population and Nutrition Office, sinaysay kaini na padagos an saindang pag-implementar kan population and development program siring kan responsible parenthood, family planning, adolescent health and development asin iba pa.
Sigun ki Macaraig, agresibo an saindang lado tanganing maipautob an nasambitan ng mga programa tanganing masimbagan an problema sa salud asin pagbuhay kan mga tawo.
Katakod digde, nakatutok soboot sinda sa family planning program o services kun saen saindang pigsisierto na available asin accessible sa mga residentes kan siyudad nin Naga an mga ini.
Pigsaysay pa kan opisyal na maski nagbabago nin liderato, an mga programa na saindang napuonan an padagos na pigbubusol para sa kapakanan kan mga tawo asin malikayan an orog na dakulang problema sa salud.
Sa ngunyan, hagad na sana kan City Population and Nutrition Office an kooperasyo kan publiko tanganing magin marhay an dalagan kan mga programa na para sa publiko.
