NAGA CITY- Liwat na ikukundusir sa pangengenot kan DTI-Camarines Sur an Feria de Camarines featuring Muebles sa sarong mall sa siyudad nin Naga sa maabot na Mayo 29 hasta June 2, 2025.
Sa entrevista kan Bombo Radyo Naga ki Jay Percival Ablan, Provincial Director kan DTI-CamSur, sinaysay kaini na saindang piglilimitaran sa 15 na exhibitor an saindang pig-imbitaran asin mapartisipar tanganing makabwelo an mga ini sa nasambitan ng aktibidad.
Sigun pa ki Ablan, mayong booth na ibubugtak tanganing magkaigwa soboot nin freedom o libredo an mga Micro, Small and Medium Enterprises (MSME) na gikan sa Camarines Sur na magset-up kan saindang mga Muebles.
Pigtawan duon kan opisyal na lifestyle set-up an display kan mga Muebles tanganing maipahiling sa mga tawo kun ano an magigin itsura kaini sa laog kan harong o sarong establishment.
Mientrastanto, kan Abril pa nagpuon an preparasyon kan DTI-Camsur sa nasambitan ng aktibidad kun kaya final briefing na sana man an gigibuhon kasado na an second edition kan Feria de Camarines.
Sa ngunyan, pig-enkaminar na sana kan opisyal an publiko na makisumaro asin anduyugan an nasambitan ng aktibidad komo pagtaong suporta sa gibo kan mga Micro, Small and Medium Enterprises sa probinsiya nin Camarines Sur.
