NAGA CITY- Padagos na pig-iimbestigaran kan Naga City Police Office an nangyaring panghahabon sa Naga City People’s Mall kasuudma, Mayo 21, 2025.
Sa nagin paghampang sa mga kagawad kan media ni PLTCOL. Chester Pabuayan Pomar, Public Information Officer kan Naga City Police Office, sinaysay kaini na mantang nag-aasikaso an biktima na binistong si alyas Maricar, 42-anyos kan nagbabakal na indibidwal sa saindang pwesto sa merkado publiko kan bigla na sana soboot mapansin kaini na nawawara na an saiyang bag.
Sigun sa opisyal, an nasambitan ng bag an igwang laog na cash, necklace, cellphone asin iba pang gamit na nagkakantedad nin poco mas o menos P300k.
Kan hilingon sa video footage gikan sa CCTV camera an mga suspek an tolos na nagdulag lunad kan sarong tricycle asin saka nagbalyo sa SUV.
Katakod digde, nakua man an plaka kan lunadan na ginamit kan salarin kun kaya padagos an saindang pagpapattern sa insidente.
Nakipag-koordinar naman an NCPO sa Land Transportion Office asin naghahalat na sana sinda kan feedback tanganing masusog an mga suspek.
Apwera digde, nakipag-koordinar naman an Police Station 1 sa Highway Patrol Group enkaso igwa sindang dating record kan mga suspek.
Mientrastanto, sa presente dae pa man soboot masasabi kun dakulang grupo an may kagibo kaini alagad well-trained soboot sa mga siring na klase kan panghahabon o pananalisi.
Sa ngunyan, pinagirumduman na sana kan opisyal an publiko na magin alerto sa saindang kapalibutan tanganing dae mabiktima kan mga kawatan na naglipana sa kapalibutan.
