Pig-enkaminar kan sarong non-government organization (NGO) an iba pang mga biktima kan war on drugs na maglantad asin magtao nin testimoniya sa kaso kontra ki dating Presidente Rodrigo Duterte sa International Criminal Court (ICC) sa The Hague, Netherlands.
Sa sarong statement, pig-enkaminar kan grupong Duterte Panagutin Campaign Network an isay man na apektado kam mga paggadan, iligal na pag-arestar asin pagkulong, pag-torture asin iba pang krimen na may kinaarman sa war on drugs na makipag-koordinar sa sainda para sa kaukulang tabang tanganing mapanimbag soboot an dating Presidente.
Anuman soboot impormasyon na ipapaabot sa sainda an magiging confidential asin dae ini maluwas sa publiko o sa isay man na mayong permiso.
Pigpunto man kan organisasyon na may tiyansang magamit sa kaso ni Duterte sa ICC an itataong testimoniya kun an testigo an kaparientes o haraning amigo kan biktima kan drug war o personal na apektado sa mga paggadan.
Siringman, kapag an krimen an nangyari puon November 1, 2011 asin March 16, 2019, kan panahong nanungkulan komo alkalde kan Davao City si Duterte hasta sa enot na kabangan kan saiyang pagsisirbi komo presidente kan nasyon antes dagusang magtiwalag an nasyon sa ICC.
Sigun man sa NGO na posibleng maibali komo parte kan pagsusunad nin mga kaso sa lokal na korte an testimoniya kan mga biktimang apektado kan pag-arestar, torture asin iba pang panga-abuso na dae saklaw kan scope sa kaso kontra sa dating Presidente sa ICC.
