NAGA CITY- Pigheras kan sarong registered midwife an saiyang nagin esksperyensiya antes na makapasar.
Sa entrevista kan Bombo Radyo Naga ki Francia Asedillo, registered midwife, sinaysay kaini na maogma soboot sa pagmate na maabot an minamawot sa buhay orog na kun ini an pinaglapigutan asin tinawan nin labi-labing pagsasakripisyo.
Sigun pa ki Asedillo, dae madali an saiyang inagihan huli ta kadakol ining mga problema na kinahampang alagad padagos an saiyang pagtubod sa sadiring kakayanan.
Apwera digde, yaon man an saiyang paghagad nin giya sa Kagurangnan na magin marhay an resulta kan eskasaminasyon.
Pigtawan duon man kaini na importante na gibuhng motibasyon an mga angat na kinakahampang huli ta madara man ini nin marhay na resulta.
Mientrastanto, pigsaysay man ni Magno S. Conag Jr, Presidente kan City College Naga na kaipuhan an disiplina sa sadiri asin strikto na pag-eskwela tanganing dae masayang an oras asin an kwarta na tinao kan gobierno.
Kinakaipuhan na magpuon an disiplina sa sadiri huli ta mabunga man ini nin magayon para sa sarong indibidwal.
Patotoo soboot digde an nasa 92 lisensyadong Midwife na nakapasar sa 2025 examination gikan sa City College Naga.
Sa ngunyan, padagos an pag-enkaminar kaini sa mga estudyante na enoton an marhay na desisyon para sa marhay na futuro.
