Aram baya nindo mga ka-bombo, pighatulan na kan sarong korte sa Oxford an duwang lalaking suspek sa panghahabon sa sarong gintong inidoro kan 2019 gikan sa Blenheim Palace.
Si James Sheen, 40-anyos, an pighatulan nin apat na taong pagkakakarsel na idugang pa sa 19 taon asin 4 na bulang sentensiya na dati naman kaining pigkakahampang huli sa iba pang krimen siring kan panghahabon sa mga ATM asin museo.
Marurumduman, si Sheen an naggamit soboot nin maso tanganing halion an inidoro.
Mantang pighatulan man nin 27 bulan na pagkakarsel si Michael Jones, 39-anyos.
Sigun sa hukom, dae soboot sierto kun kaibahan mismo si Jones sa grupo na naghabon alagad napatotoohan kaya na nagmanman ini sa lugar antes an krimen.
Mientrastanto, an inidoro na gibo sa purong ginto an pigkakarkulo na nagkakantedad nin nasa £4.75 milyon o ₱450 milyon.
Makalihis na mahabon, pinagtutubudan na ini an pigtunaw o pinagsuruhay asin tolos na pinabakal.
Antes man na ini an hinabon, ini an naka-display sa Guggenheim Museum sa New York.
Pigtangro pa soboot ini kaidto ki US President Donald Trump komo pautang mantang nasa puwesto alagad ini an pigsayumahan kan White House huli ta mawot soboot ninda kan painting ni Van Gogh.
An artist na si Maurizio Cattelan an naggibo kan inidoro.
An saro pa sa saiyang mga obra an batag na pigdukot sa pader gamit an duct tape na kun saen kan taong 2024 ini an naipabakal sa kantedad na $6.2 milyon sa sarong auction sa New York.
