Piglalaomang matinir an ₱45 kada kilo na suggested retail price (SRP) kan 5% broken imported rice kan Department of Agriculture (DA) sa tahaw kan naglalangkaw na presyo kan langis asin shipping cost huli sa tensyon sa pag-ultanan kan Israel asin Iran.
Sigun ki Agriculture Secretary Francisco Tiu Laurel Jr., dakula an posibilidad na dae muna hihiruon an presyo hasta sa magrahay an sitwasyon.
Dae man muna malangkaw an presyo kan mga Rice for All (RFA) varieties na pinapabakal sa mga Kadiwa store.
Naenot nang inanunsyar kan DA na posibleng magbaba nin ₱1 hasta ₱2 an presyo kan RFA rice sa Hulyo, kun saen posibleng magbaba sa ₱43/kg an 5% broken rice. Sa ngunyan, an RFA5 an ₱43/kg, RFA25 an ₱35/kg, asin RFA100 an ₱33/kg.
Apwera sa epekto kan pankinabang presyo kan langis, binanggit man ni Laurel an pagluya kan piso kontra sa dolyar—gikan ₱55 kan bulan nin Mayo, nagbaba ini sa ₱57.17 kan nakalihis man na Biyernes.
