Tinawan-duon kan kampo ni former Negros Oriental Representative Arnolfo ‘Arnie’ Teves Jr. na mayo soboot nin plano o intensyon an dating kongresista na magdulag.
Ini mismo an pigkumpirmar asin pigtawan-duon kan saiyang abogado na si Atty. Ferdinand Topacio tanganing maipaabot ki Department of Interior and Local Government Secretary Jonvic Remulla.
Kun saen mawot soboot linawon kan saindang kampo na ini an mayo sa mga planong gibuhon kan dating kongresista mantang nagtitinir sa laog kan ospital.
Sigun kaya ki Atty. Ferdinand Topacio na Malabo ining mangyari orog pa ta igwa nin tubo gikan sa dugo hasta sa laog kan tulak kan saiyang kliyente.
Dugang pa kaini, nakakonektar an tubong ini sa tolong bote kan medikasyong nadaloy sa ugat kaya si Teves an presenteng dae marhay makusog.
Dae soboot kaini kayang magdalagan tanganing magdulag sa Philippine General Hospital kun saen ini pigdara asin pig-operahan.
Marurumdoman, pig-operhan an nasambitan ng dating kongresista makalihis makaeskperyensiya nin labing pangungulog nin tulak mantang nasa laog kan saiyang kulongan sa Camp Bagong Diwa, Taguig City.
