Suportado kan National Police Commission (NAPOLCOM) an mga lakdang kan Philippine National Police (PNP) na linigon an kabo kan pulisya, orog na sa mga pulis na mabibigo o magkukulang sa saindang trabaho.
Sigun ki Napolcom Executive Director Rafael Vicente Calinisan dapat matawan bastante na ‘elbow room’ si Police Gen. Nicolas Torre III tangani maisagibo an mga hinahagad na pagbabago sa kabo kan pulisya.
Importante na matawan an bagong Chief PNP sa saiyang mga inisyatibang linigon an hanay kan pulisya nin huli ta sigurado man na mabalik sa saiya kun dae kaini gagampanan an trabaho.
Inihalimbawa kan opisyal an 5-min response time na primerong ipinagsugo ni Presidente Ferdinand Marcos Jr. sa bagong PNP Chief kasabay kan saiyang pagtukaw.
An ginigibo kan pulisya na dagusang pagribay sa mga non-performing police official asin mga ground commander an parte sana kan hinahagad na reporma sa hanay kan PNP.
Bagaman pinaglalaomang kadakol na mga pulis an maaapektaran o masasagasaan, sigurado soboot sa huri, makakarahay man ini sa mga pulis asin sa mga komunidad, na parehas naghahagad nin marikasang pagsimbag sa manlaen-laeng mga krimen.
Nanindugan an Napolcom Chief na kun kaipuhan mang magtanggal nin mga pulis na dae makakasunod sa mga bagong polisiya, papabayaan soboot kaini si Gen. Torre III nin huli ta sigurado man na ikakamarhay man ini kan organisasyon.
