NAGA CITY- Posible soboot na makaeksperyensiya pa nin pag-uuran an Bicol Region partikularmente an Camarines Sur sa mga masunod na aldaw.
Sa entrevista kan Bombo Radyo Naga ki Ian Niel Nuñez, OIC, CBSUA-Pili Agromet Station, sinaysay kaini na sa saindang forecast extended weather outlook para sa limang aldaw, mahihiling na makakaeskperyensiya nin mapanganuron sagkod mauran na panahon an Camarines Sur orog na sa may western part.
Sigun ki Nuñez, ini an huli sa epekto kan habagat na iyo man nagpapauran sa area kan mga nakalihis na aldaw.
Katakod digde, liwat na nagpagirumdom an opisyal sa publiko partikular sa mga nasa low lying areas na pirmeng maglikay asin magin updated sa panahon tanganing makalikay sa anupaman na katibaadan.
Marurumduman, kan nakalihis na mga aldaw nakaesksperyensiya nin pagbabaha sa nagkapirang banwaan sa Camarines Sur asin magin sa siyudad nin Naga makalihis an pirang oras na pag-uuran.
Huli kaini, kaipuhan soboot an labing pag-iingat asin preparasyon tanganing dae mabugtak sa alanganin na sitwasyon.
Sa ngunyan, padagos na nakamonitor an state weather agency sa may parte kan Pili tanganing makapagtao nin accurate asin malalaoman na impormasyon na igwang kinaaraman sa kamugtakan kan panahon.
