NAGA CITY- Aminado an alkalde kan siyudad nin Naga na kadakol pang kaipuhanon sa pagsimbag sa nangyayaring pagbaha sa lugar.
Sa nagin paghampang sa mga kagawad kan media ni Naga City Mayor Leni Robredo, sinaysay kaini na antes pa man ining magtukaw komo City Mayor, nakapagsumiter na ini nin mga proposal sa manlaen-laen na ahensiya na makakatabang sa nasambitan ng problema.
Katakod digde, igwa nang mga pledges alagad kaipuhan na nin mga aksyon tanganing ma-minimize an nangyayaring pagbaha.
Sigun ki Robredo, an tubig na naghuhuros paibaba sa Naga an madali magluwas kun kaya kaipuhan na maaraman an pinaka-ugat kan problema asin maggibo nin plano na masimbagan ini.
Katakod digde, nakipag-meeting na soboot an alkalde sa DPWH Region asin District dapit sa mga purutol asin saradit na drainage na dae naman akma o tama sa presenteng pangangaipuhan kan siyudad.
Mientrastanto, yaon man soboot an pig-aapod na Bicol River basin na saro sa mga magayon na kaplanuhan sa pagsimbag sa pagbaha alagad dae naglalaom digde si Robredo nin huli ta baad soboot tapos na an saiyang termino dae pa ining mapangyari huli man sa manlae-laen na factors.
Kun kaya kaipuhan na magbilog na nin mga alternatibong lakdang tanganing mabawasan en epekto kan labing pagbaha sa Naga City.
Sa ngunyan, dagos-dagos an pigsasagibong konsultasyon kan opisyal sa manlaen-laen an sektor tanganing gibuhong salbado an Naga City sa oras nin katibaadan.
