Pigpreparar na kan Department of Justice an nagkapirang kaso na pwedeng isunad kontra sa mga suspek na mapapatunayang imbwelto sa pagkawara kan mga biktimang sabungero.
Sigun mismo ki Justice Secretary Jesus Crispin Remulla, ini ngunyan an saro sa mga pinagtutuonan nin pansin kan mga abogado kan ahensiya mapadapit sa kaso.
Kun saen, masusi soboot pinag-aadalan kan Department of Justice an mga kasong isusunad mapadapit sa isyu kan ‘missing sabungeros case’.
Apwera soboot sa murder case, posibleng igwa pang iba na kasong isusunad siring na sana kan ‘kidnapping’ na naayon sa International Humanitarian Law an saindang ikokonsiderar.
Mientrastanto, katakod man sa paghahanap kan kagawaran sa labi kan mga nawawarang sabungero, ipigheras ni Justice Secretary Remulla na an may kansadiri kan fish pond sa Taal Lake na ground zero sa diving operation an saindang iimbestigaran.
Imbwelto kaya ini sa krimen o disposisyon kan paggadan sa mga biktima na saiyang pinagtutubodang piglubong sa nasambitan ng lokasyon.
Dae soboot maaraman kan sekretaryo kun papano isinagibo an ‘execution’ sa mga biktima na an iba an piglubong mantang may buhay pa.
Sa presente, katuwang kan Department of Justice an manlaen-laen na ahensiya kan gobyerno tanganing maisagibo an opisyal na pagsisid sa nasambitan ng parte kan lawa.
Sainda man pighagadan nin tabang an nasyong Japan tanganing magpasubli ini kan nagkapirang dugang na kagamitan para sa planong primerong exploratory dive sa Taal Lake.
