NAGA CITY- Nagpapadagos an CASURECO II sa saindang pigsasagibong relocation kan mga linya nin kuryente.
Katakod digde, kasuudma, Hulyo 16, 2025 maghapon an nagin pagtrabaho kan mga linemen kan CASURECO II tanganing ibalyo an mga linya nin kuryente gikan sa mga lumang poste na nasakop kan road widening project sa Balatas-Cararayan-San Isidro Road.
Parte ini kan mga lakdang na mahali an 898 na lumang poste na nahagip kan mga road widening projects sa siyudad nin Naga.
Marurumduman, saro sa mga nagin agrangay kan mga motorista siringman mga residente sa lugar an nasambitan ng prolema na tolos man pig-aksyunan kan LGU-Naga katabang an nasambitan ng kooperatiba.
Sigun sa pamayuhan kan CASURECO II an pagbalyo na ini kan linya nin kuryente sa mga bagong posteng na dae nakakaulang sa pig-aagihan kan mga motorista an makakatabang tanganing malikayan an anuman na aksidente sa tinampo.
Mientrastanto, marurumduman pa, nagpasalamat si Naga City Mayor Leni Robredo sa marekas na aksyon kan saiyang pakiulay sa Casureco II, kun sain napunan tulos an patrabaho kan Hunyo 30, sa enot na hapon kan saiyang pagtukaw komo alkalde kan siyudad.
Sa ngunyan, pigsierto na sana kan Casureco II na mapadagos an saindang patrabaho tanganing tolos na matapos an nasambitan ng problema.
