Sasamantalahon ni Presidente Ferdinand Marcos Jr., an pagkakataon tangani bukasan an mga urulay na igwa nin kinaraman sa Pilipinas asin liwat na ibusol an interest kan mga Pilipino sa saiyang state visit sa Amerika saaga.
Sa pre-departure briefing sa Malacañang, sinaysay ni Foreign Affairs Asec. Raquel Solano, na apwera sa pag urulay sa 20% reciprocal tariff na ipinataw kan Amerika sa Pilipinas, nilalaoman man an pag ulay sa mga development o mga nangyayari sa West Philippine Sea (WPS).
Naglalaom an gobyerno na sa state visit na ini, liwat na makapag-secure an Pilipinas nin suporta liwat sa US, tangani pahiguton pa an kakayahan asin man kagamitan kan Armed Forces of the Philippines (AFP) asin kan Philippine Coast Guard (PCG).
Mientrastanto, dae man magkakaigwa nin pagkakataon na makipaghilingan an Presidente sa Filipino community sa Amerika huli man sa halipot na oras.
Si Presidente Marcos, nakatalaang maghali nin nasyon sa masunod na aldaw, July 20, asin mahaloy sa Amerika nin hasta sa Hulyo 22.
