NAGA CITY- Pig-ako kan lokal na gobierno kan siyudad nin Naga na nagtitinir na maluya an suporta pag-abot sa sports program.
Sa nagin paghampang sa mga kagawad kan media ni Naga City Mayor Leni Robredo, sinaysay kaini na sulamenteng pagsimbag sana sa mga request kan atleta an saindang nagigibo alagad mayong deriktang suporta na nakukua sa gobierno.
Katakod digde, pinag-aadalan na kan saindang lado kun pano matawan nin tabang an mga atleta tanganing masimbagan an nasambitan ng problema.
Dugang pa kan opisyal, dae man nagkukulang sa mga coaches alagad talagang maluya an suporta na nakukua kan mga atleta na makakatabang kuta sa saindang mga laban.
Pigsaysay pa kan alkalde na tuyong nagkakaigwa sana nin Palaro asin iba pang mga kompetisyon nakakatao sinda nin asistensiya sa mga atleta na dae bastante tanganing orog na mapauswag an lado kan karawat sa siyudad nin Naga.
Importante soboot na namamatean kan mga atleta an tabang gikan sa lokal na gobierno tanganing magserbeng kusog kan mga ini tanganing maabot an mga pangaturugan sa buhay.
Sa mga suportang ini nasasabutan kan mga kaakian na dae sinda pinabayaan kan gobierno sa saindang mga kahagadan.
Sa ngunyan, pigsierto na sana ni Robredo na padagos an saindang pagbilog nin mga programa tanganing pakusugon an sports program kan gobierno sa Naga City.
