NAGA CITY- Mapakol sa labi 300 na indibidwal an dae nakapag-exam sa pigkundusir na Civil Service Examination kan nakalihis na August 10, 2025.
Sa entrevista kan Bombo Radyo Naga ki Maria Dolores Salud, Director II kan Civil Service Comission, Camarines Sur field Office, sinaysay kaini na nag-abot sa 352 an numero kan mga non-attendees kabali na digde an mga na-late na indibidwal kun saen nasaraduhan nin gate kan mga eskwelahan.
Paliwanag kan opisyal, eksaktong alas 7:45 nin aga, an mga nasambitan ng eskwelahan an dae na maako nin mga examinees kun kaya liwat na pinapagirumdom an gabos na mag-amay asin magin preparado.
Sigun ki Salud, sa Camarines Sur National High School sa Liboton, nag-abot sa 2,087 an actual examinees mantang sa CBSUA Pili nagpakol man sa kabilugang 2,161.
Katakod digde, an mga indibidwal na bigong makapag-exam an liwat na ma-apply para sa masunod na eksaminasyon sa taong 2026.
Mientrastanto, piglalaoman na mailuluwas an resulta kan eksaminasyon bago an bulan nin Nobyembre alagad naglalaom ini na kadakol man an makakapasar.
Sa ngunyan, nagpa-abot man nin pasasalamat an opisyal sa gabos na saindang nakatabang tanganing magin matrayumpo an eksaminasyon kabali na digde an PNP asin an mga katuwang nindang eskwelahan.
