Sarong planta kan nuclear sa France an paramientras na isinarado kan nakalihis na Lunes makalihis na laogon kan kadakol na jellyfish an mga filter kan pasilidad.
Sigun sa operator kaining EDF, naapektaran an sistema kan paglipot kan Gravelines nuclear power plant sa hilagang France, kaya awtomatikong nagsarado an apat sa anom na reactors kaini.
An natatadang duwa an naka-schedule nang isarado para sa maintenance.
Pigsierto kan EDF na mayong nagin epekto sa kasalbaduhan kan planta, mga personahes o kapalibotan an pagdakol kan Jellyfish na nasa non-nuclear na parte kan planta.
Ipinaliwang pa kan mga eksperto na an mainit na panahon sa Europa an posibleng rason kan pagdakol kan jellyfish, na natural na makukua sa North Sea.
Sigun sa sarong nuclear engineer, nakalusot an jellyfish sa mga enot na filter huli sa saindang malumoy na lawas.
Bako ini an enot na pagkakataon na nangyari, kun saen igwang mga kaparehas na insidente na man sa ibang nuclear plants sa nakalihis, alagad ini an pigkokonsiderar na bihira.
