NAGA CITY- Pigreport kan Department of Labor and Employment Bicol na igwang kabilugang 4,054 minimum wage earners an nabenipisyaran sa Benteng Bigas Meron Na Program kan Marcos administration puon kan ilunsar ini sa Rehiyon kan June 13.
Sigun ki DOLE-5 Director Imelda Gatinao, an programa nagtatangro nin baratong bagas sa mga obrero na nagpopromoter kan sustainability asin pagpapapusog kan food security sa komunidad.
Dugang pa kan opisyal, an nasambitan pa na programa an binilog tanganing masimbagan an pangangaipuhan kan mga Pilipino orog na an mas nangangaipuhan.
Target kaini an mga minimum wage earners, apwera sa mga vulnerable sector, tanganing tawan an mga ini nin access sa de kalidad na bagas na nagkakantedad sana sa P20 per kilo.
An inisyatiba na ini an bako sanang nagsisimbag sa pang ara-aldaw na pangangaipuhan kan mga obrero kundi an pagsuporta pambansang obheto na pagkakapantay-pantay asin food security.
Pigsaysay pa kan opisyal na pigpapapusog pa kan programa an farm-to-market chain o supply siringman an pagsierto na an mga paraoma makakaprodusir nin merkado na paborable sa sainda.
Mientrastanto, sa Camarines Sur nagpakol na sa 1,240 an nag-avail kan programa; 835 sa Camarines Norte; Albay, 516 na obrero; Catanduanes, 419 workers; Masbate 89 na mga obrero asin Sorsogon na igwang 955.
