AN Pantawid Pamilyang Pilipino Program (4Ps) an tinawan nin pondo na nagkakantidad nin labi P112.9 billion sa irarom kan prosopwestong 2026 national budget.
Alagad mayong alokasyon para sa Ayuda sa Kapos ang Kita Program o AKAP sa irarom kan 2026 National Expenditure Program o NEP.
Ini an kinumpirmar ni Budget Secretary Amenah Pangandaman.
An AKAP an pigtatao para duman sa mga minimum-wage earners kun saen nagkakaigwa ini nin kontrobersiya huli ta tinawan ini nin alokasyon sa 2025 national budget na nagkakantindad nin P26 billion.
Sinaysay pa ni Pangandaman na igwa pang natatadang pondo para sa 2025 national budget. Limitado man soboot an fiscal space kaya dae muna ninda pigbali an AKAP sa tinawan nin pondo.
Ipinaliwanag kan sekretaryo na nasa labi sampolong trilyong piso an orihinal na kabilogang kantidad an budget proposals gikan sa mga ahensiya alagad dae gabos natawan.
Sinaysay man ni House Committee on Appropriations Chairperson Mikaela Suansing na dae pa napapag-ulayan sa Kamara an AKAP alagad mabase soboot sinda sa pigsumiter na NEP.
Dinepensaran man ni Suansing an AKAP asin pighurot na labing nakatabang ini sa mamamayan orog na sa mga dae naaabot kan Assistance to Individuals in Crisis Situations o AICS asin minimum wage earners.
Sa Budget message ni Presidente Marcos, an TUPAD o Tulong Panghanapbuhay sa Ating Disadvantage Workers Program, natawan nin alokasyon na P11 billion mantang an Department of Labor and Employment Integrated Livelihood Program an makakaresebir nin P2.2 billion budget.
Dinepensaran kan Presidente an pondo na piglaan sa 4Ps huli ta makakatabang ini na matawan nin dekalidad na buhay an nasa 4.4 million na mga marginazlied household beneficiaries.
Kaibahan sa mga tabang na itatao iyo an cash grants, rice subsidy, enhanced support services intervention grants, cash grants para sa first 1000-day health monitoring during pregnancy hasta sa magin 2-anyos an aki.
