Inaprubaran kan International Criminal Court (ICC) an kahagadan kan kampo ni dating Presidente Rodrigo Duterte na suspendiron an nagkapirang deadlines sa pagsusumiter kan nagkapirang dokumento mantang naka-recess an korte.
Naenot na kayang pinagsusumiter kan ICC Pre-trial Chamber I an defense team kan dating Presidente nin public version kan sarong confidential document, bagay na dae man pinalagan kan defense team basado na man sa lead counsel na si Nicholas Kaufman.
Katakod kaini, tinugutan kan chamber an request kan defense team na suspendiron an nagkapirang deadlines magpuon Hulyo 25 nim alas-5:30 nik pagkahapon asin man pinalawig pa ini nin hasta sa Agosto 18, 2025, alas-9:00 nin pagkaaga.
Mientrastanto, nagluwas man an Pre-Trial Chamber nin sarong report na igwa nin gabos nin desisyon na ginibo sa pag-ultanan kan Mayo asin Hulyo nin presenteng taon, alagad nagkapirang parte kan nasambitan ng report asin 36 annexes an isinapribado mantang pighali an sensitibong impormasyon para na man sa security reasons.
Sa ngunyan, nagtitinir na nakadetine si dating Presidente Duterte sa detention facility kan ICC mantang pighahalat an nakatalaang kumpirmasyon kan charges laban sa saiya na crimes against humanity may koneksyon sa soboot mga paggadan sa irarom kan saiyang war on drugs campaign sa Setyembre 23.
