Nagpakol na sa 20 an kumpirmadong gadan mantang 134 an irido sa sarong pagsabog sa sarong pabrika sa rehiyon kan Ryazan, Russia.
Sigun ki Pavel Malkov, gobernador kan Ryazan, nagpuon an insidente sa sarong kasulo sa laog kan workshop kan nasambitan ng pasilidad.
Siringpaman, dae pa malinaw kun ano an kawsa kan kasulo o kun ano an ginibo sa pabrika.
May mga report na posibleng sa panta nagpuon an pagsabog, alagad dae ini kinumpirmar kan mga opisyal. Sa presente, 31 sa mga irido an nagtitinir sa ospital mantang 103 an nagpapabulong komo outpatient.
Ipinahiling sa mga video gikan sa Ministry of Emergency kan Russia an hewas kan danyos, kun saen mahihiling an mga bumbero asin search dogs na naghahanap sa nagrasay na parte kan establisyemento.
Igwa man mga psychologist na nagtatao nin suporta sa mga apektadong residente. Padagos pa an ginigibong imbestigasyon dapit sa kawsa kan insidente.
