Nagtatakas na an mga Palestino gikan sa pirang parte kan Gaza City makalihis puonan na kan Israel an primerong yugto kan saindang planadong ground offensive.
Ginatos na mga Palestino sa Al-Zeitoun asin Al-Sabra neighborhood kan Gaza City an nag ebakwar pasiring hilagang-kanlurang parte kan siyudad makalihis an matitinding pambobomba sa lugar na ikinaraot man kan mga kaharungan, asin ikinagadan man kan dose-dosenang katao kabali na an mga pamilyang nasa tent asin kaharungan siringman an pirang mga inosenteng kaakian, basado sa international media.
Sigun sa tagapagtaram kan Israeli Defense Forces, nagkasa na nin operasyon an saindang mga tropa sa Seitoun asin Jabalia areas para sa occupation plan makalihis aprubaran ni Defense Minister Israel Katz kan nakalihis na Martes.
Mapakol man sa 60,000 reservists an pinaapod sa pagpupuon kan bulan nin Setyembre tangani ideploy kaiba kan active-duty personnel para sa operasyon.
Inihayag man ni Israeli Prime Minister Benjamin Netanyahu na pinalipot kaini an timeline tangani makubkob an inapod kaining huring kuta kan teroristang Hamas sa Gaza.
Sa sarong statement, inakusaran kan Hamas si Netanyahu sa pagpapadagos kan brutal na giyera laban sa mga inosenteng sibilyan sa Gaza City asin man binatikos an pagbalewala kaini sa propwestong ceasefire gikan sa regional mediators.
Enot digde, nakontrol kan mga tropang suldados kan Israel an luwas kan Gaza City na istaran kan labi sa sarong milyong mga Palestino, makalihis an pirang aldaw na matinding pambobomba asin man artillery fire.
