Nagpatanid an top diplomat kan European Union (EU) laban sa pigbubusol na pagsuko kan Ukraine sa pirang mga teritoryo kaini sa Russia komo parte kan peace deal sa hinahanap na sarong bitag ni President Vladimir Putin.
Sigun ki European Commission Vice-President Kaja Kallas, na pigbugtak sa wanted list kan Kremlin, an pagtugot sa Russia na imantinir sa saindang kontrol an Ukrainian territories an sarong bihag ni Putin na mawot kaining sunudon ninda.
Kabali sa mga teritoryo kan Ukraine na mayorya an nasa kontrol kan Russia iyo an Donbas region sa eastern Ukraine, na padagos na tinututulan man kan Kyiv na isuko sa Kremlin karibay kan katoninungan.
Alagad naenot ng sinaysay ni US President Donald Trump na kaipuhang magkaigwa nin “swapping of territories” tangani makua an katrangkiluhan sa pag-ultanan kan duwang nasyon.
Sa Alaska summit, sinaysay ni Kallas na nakua ni Putin an gabos kan saiyang gusto asin pwedeng makaapektar ini sa saiyang interes sa pakikipagnegosasyon para sa peace deal.
Mawot man ni Putin na dae mapatawan nin sanctions an saindang nasyon, bagay na saiya man na nakua. Naoogma sana soboot si Putin asin dae nag uuntok sa paggadan imbes na pigdugangan pa ini.
Nalilingawan man na dae man sana naglatag nin sarong concession an Russia.
Marurumduman na kabali si Kallas asin iba pang lider kan EU countries siring kan France, Germany, Italy asin Finland an nag iba sa pag ulay sa pag-ultanan ninda Ukrainian President Volodymyr Zelensky asin Trump sa White House pirang aldaw sana matapos an Trump-Putin summit sa military base sa Alaska na parehas nakasentro sa adhikaing mawakasan na an giyera sa Ukraine asin Russia.
Mientrastanto, pigtalaan man ni Trump kan Huwebes an duwang semanang time frame tangani ma-evaluate an peace talks sa pag-ultanan kan Russia asin Ukraine.
