Nagpatanid si Senate President Francis “Chiz” Escudero na ipapaarestar an mga kontratista kan mga kuwestiyonableng flood control projects kun dae sisiputon an ikakasang liwat na pagdangog kan Blue Ribbon Committee.
Nakatalaan sa Setyembre 1 an ikaduwang pagdangog kan komite kun saen pina-subpoena na an mga contractor na enot nang isinapubliko ni Presidente Ferdinand Marcos Jr.
Pigtawan-duon ni Escudero an dae ini maduwa-duwang isip na pirmahan an arrest warrant kontra sa mga kontratisyang dae ma-atendir sa imbestigasyon.
Nakasaysay soboot sa panundon kan Senado na pwedeng ipaarestar an sisay man na pigtawan nin subpoena alagad nag-iwas na maghampang.
Dugang pa kaini, obligasyon kan mga contractor na magpaliwanag dapit sa mga soboot ghost asin substandard na proyekto.
Mientrastanto, sinaysay man ni Senador Joel Villanueva na mayong dapat santuhon asin dapat mapadusahan, ini man an senador o kongresista na imbwelto sa maanomalyang flood control projects.
Komo halimbawa, tinukoy kaini an proyekto sa Bulacan na personal na binisita kan Presidente.
Nakapalaman soboot ini mismo sa National Expenditure Program (NEP) asin bakong insertion, taliwas sa nagkapirang pahayag kan nagkukuwestiyon digde.
Siring man, piglinaw ni Villanueva na dae boot sabihon kaini na mayong nangyaring insertion sa ibang parte kan budget.
Naogma man si Senadora Imee Marcos sa pagsayuma ni Batangas 1st District Representative Leandro Leviste sa suhol ni Batangas 1st District Engineer Abelardo Calalo.
Bistado soboot ni Marcos an kongresista puon kan ini aki pa asin naglalaom ining idadagos ni Leviste an isinunad na kaso kontra sa district engineer.
Naisirbe na kan Senado an apat na subpoena sa mga kontratista na igwang istaran o opisina sa Metro Manila katakod kan imbestigasyon sa mga kuwestyonableng flood control projects.
Sigun ki Senate Sergeant-at-Arms Mao Aplasca, isisirbe na man an natatadang anom na subpoena sa manlaen-laen na probinsiya kaiabahan an Albay, Sorsogon, Bulacan, Pampanga asin Benguet.
