NAGA CITY- Pigsaysay kan Director kan Regional Apiculture Center kan Central Bicol State University of Agriculture na obheto soboot kan RAP iyo an makatabang sa mga paraoma na makanood sa pag-aataman kan mga stingless bee.
Sa entrevista kan Bombo Radyo Naga ki Johanna Cordial, Director kan Regional Apiculture Center kan CBSUA, sinaysay kaini sa paagi kan Regional Apiculture Center tinatabangan ninda an mga paraoma kun pano an pagpapadakol sa mga stingless bee tanganing magserbeng hanapbuhay ninda.
Ini an sa paagi kan pagkundusir nin mga seminars asin trainings.
Sigun pa sa opisyal, kaya mga stingless bee an yaon sa CBSUA nin huli ta dakulang tabang an mga honey bee products komo anti-oxidant asin anti-inflammatory. An saindang eskwelahan an sentro kan pag-ataman nin mga stingless bee sa Rehiyong Bicol.
Mientrastanto, saro pa sa mga flagship program kan CBSUA iyo an paggugulay asin iba pang pananom na obheto giraray makatabang sa mga paraoma.
Adbokasiya soboot kan saindang lado an mapakusog an production o yields na makakatabang man sa bilog na Bicol Region.
Sa ngunyan, pigsierto na sana ni Cordial na padagos an saindang mga programa sa pagbusol kan agrikultura sa Rehiyon tanganing makatabang sa pag-uswag kan nasyon.
