NAGA CITY- Nagpakol sa nasa 101 na paratukdo kan Technical Vocational Course sa enterong Bicol Region an nagsairarom sa training kan TESDA-Pili.
Sa entrevista kan Bombo Radyo Naga ki Marjorie Orosco, Public Information Officer kan TESDA Regional Training Center-Pili, sinaysay kaini na enot na nag-arangkada an programa sa Naga Division alagad magayon soboot an feedback asin response na saindang nakua kun kaya naaraman kan ibang mga probinsya.
Sigun ki Orosco, sa irarom kan programa, nagsasairarom sa pagsasanay an mga paratukdo sa pig-aapod na trainers methodology level 1.
Obheto kaini na mas pamarhayon pa asin mapanuan an skills na dati ng igwa an mga paratukdo tanganing makaprodusir nin marhay na mga estudyante.
Marurumduman, an haros gabos na mga eskwelahan an igwang TVL Track para sa junior asin senior high school kun kaya importante na napapalangkaw an saindang level kan certification.
Dugang pa ni Orosco, obheto pa kan programa na makalihis na mag-graduate kan mga estudyante igwa sindang kakayanan na makahanap nin trabaho o ipadagos an saindang pag-aadal sa kolehiyo.
Sa ngunyan, pigsierto na sana kaini na padagos an saindang ginigibong mga paagi tanganing makatabang sa komunidad asin pagpapauswag kan nasyon.
