Kinumpirmar ni Senate President Pro-Tempore Ping Lacson na igwang P355 million budget insertion para sa flood control projects sa Bulacan ngunyan na taon.
Marurumduman na sa Kamara, itinukdo ni dating Bulacan Assistant District Engineer Brice Hernandez si Senador Jinggoy Estrada na soboot nagtagama kan nasambitan ng karibay kan 30% komisyon.
Sigun ki Lacson, nagluwas sa saindang pag-aadal na nakapalaog sa 2025 General Appropriations Act an P355 milyon, alagad mayo ini sa National Expenditure Program asin sa House budget version.
Maliwanag soboot na sa Senado o bicam ini naisingit.
Siring man, dae maaraman kun sisay an lehislador na naglaog nin pondo.Limang proyekto an sakop kaini asin pigpapasuri ni Lacson kun lehitimo an implementasyon.
Komo paggalang sa inter-parliamentary courtesy, posibleng makipag-ulay muna si Lacson ki dating Senadora Grace Poe, na soboot namayo sa Senate Committee on Finance, tanganing aramon an totoong proponent kan nasambitan ng budget.
Kinumpirmar man ni Lacson na nagbisita sa Senado an representantes kan WJ Construction Company na tinukoy ni Hernandez sa pagdangog sa Kamara komo tagadara soboot kan “obligasyon” o lagay.
Sigun ki Lacson, sarong nagngangalang Mina an nagpasiring sa Senado kan nakalihis na Agosto 19, 2025.
Pigpapa-review na an mga CCTV footage tanganing maaraman kun saen na opisina ini nagpasiring asin kun sisay an saiyang nakaulay.
May ideya na man an senador kun sisay an pigdumanan ni Mina alagad pighurot kaini na kaipuhang ipaapod ini para personal na magpaliwanag.
Dugang pa kaini, kun maluwas na sarong senador an dinumaman, nararapat ining maghampang asin magpaliwanag.
Liwat na ikakasar kan Blue Ribbon Committe an pagdangog sa Setyembre 18.
Papamayuhan na ini ni Lacson makalihis na ribayan kan senador si Marcoleta huli sa nangyaring kudeta o ribayan nin liderato.
Sigun ki Lacson, pinili kaini an Huwebes tanganing mas hababa an oras na maitagama sa imbestigasyon asin dae mabitin orog na sa mga nakalihis na pagdangog, kaipuhan nindang tapuson antes mag alas tres nin hapon para man sa sesyon.
Ipapaapod man an ‘BGC Boys” o Bulacan Group of Contractors na imbwelto sa soboot korapsiyon sa flood control peojects.
