Inilunsar kan Department of the Interior and Local Government (DILG) kasuodma, Huwebes, Setyembre 11, an Unified 911, an bagong sarong emergency hotline na pinag-iriba an gabos kan local emergency numbers sa Pilipinas.
Sa irarom kan sistemeng ini, gabos kan apod para sa pulisya, kasulo, medical, o emerhensiya an iaagi sa sarong network na konektado sa PNP, BFP, BJMP, asin mga local na gobyerno.
Sigun ki DILG Secretary Jonvic Remulla, obheto kan proyekto na gibuhong mas simple asin marekas an emergency responsde.
Gikan sa dating 200 na manlaen-laen na emergency numbers, ngunyan 911 na an saindang kaipuhan na tandan.
Apwera digde, obheto man kan ahensiya na magpatindog nin 8 dugang na call centers sa laog nin 120-aldaw.
Target pa kan ahensiya an 5-minutong response time, asin kayang magresebir nin apod sa manlaen-laen na wika siring kan Tagalog, Cebuano, Ilocano, Waray, asin Tausug.
Sa enot na aldaw kan operasyon, 58,000 apod an naireport na naresebir kan Unified 911 alagad 60% kaini an puro prank calls.
Pinatanidan man ni Remulla an publiko na an mga pauru-utrong bogus callers an isasairarom sa “least priority” asin dae na liwat makakahagad nin emergency help.
Mientrastanto P1.4 billion an pigtagama kan gobyerno para sa enot na kabtang kan peroyekto na igwang dugang na lunadan, drones, asin push-to-talks radios para sa mga responder.
