Inihayag ni Department of Public Works and Highways (DPWH) Secretary Vince Dizon na nakatalaan ining makipag-ulay sa Anti-Money Laundering Council (AMLC) sa maabot na Lunes, Setyembre 15, tanganing an posibleng pag-freeze asin pagkumpiskar kan mga ari-arian kan mga imbwelto sa anomalya sa flood control projects.
Sigun ki Dizon, bakong bastante na makulong sana an mga responsable, alagad dapat man maibweltada sa taumbayan an kwartang hinabon gikan sa kaban ng bayan.
An lakdang an pwedeng ipataw sa gabos kan indibidwal na nasunadan na o masusunadan pa nin kaso sa Office of the Ombudsman.
Mientrastanto, pigsierto ni Dizon na preparado sindang magtabang sa pigtatag na Independent Commission for Infrastructure.
Sigun sa sekretaryo, na-secure na ninda an gabos kan dokumento na pwedeng kaipuhan kan komisyon sa pag-iimbestigar kan mga imprastraktura na ginibo kan ahensiya sa nakalihis na 10 taon.
Sa ngunnyan, mantang dae pa nagpupuon an independent commission, padagos pa man an ahensiya sa pagpapanimbag sa mga imbwelto. Dugang pa ni Dizon, dae pa man sinda mauntok sa pagsusunad nin mga kaso sa Office of the Ombudsman.
Dugang pa kan sekretaryo, nakatalaang magsumiter an ahensiya nin ika-duwang batch kan mga kasong kriminal kontra sa mga opisyal asin kontratistang imbwelto soboot sa iregularidad sa flood control projects sa Oriental Mindoro sa masunod na Miyerkules.
Marurumduman kan nakalihis na Huwebes, Setyembre 11, nagsunad na si Dizon nin kaso kontra sa 25 katawo katakod kan mga maanomalyang proyekto sa Bulacan.
