Inusog sa Lunes, Oktubre 5, an testimonya kan opisyal kan Anti-Money Laundering Council (AMLC) sa impeachment trial ni Vice President Sara Duterte matapos maghagad an defense team nin dugang na oras para pag-adalan an mga dokumentong isusumite sa Senado.
Dapat kuta na humarap sa impeachment court kasuodma, Oktubre 1, si AMLC Executive Director Ronell Buenaventura tanganing ilahad asin patunayan an mga report kan AMLC manungod sa mga financial transactions na may koneksyon sa bise presidente asin sa saiyang agom na si Atty. Manases Carpio.
Segun ki lead defense counsel Atty. Sheila Sison, nakaresibe sana sinda nin mga summary kan AMLC reports bandang alas-11 nin aga kan Huwebes, Oktubre 1 kaya kaipuhan pa ninda nin panahon para pag-adalan an mga ini bago an direktang pagtatanong asin cross-examination sa witness.
Igwa man nin pagkontra an depensa sa paggamit kan AMLC records, huli ta segun sainda, sakop an mga ini kan confidentiality provisions kan Anti-Money Laundering Act.
Pig-insistir man kan House prosecution na dai pwedeng magin ulang an nasabing confidentiality rule sa sarong legal na subpoena hali sa Senate impeachment court. Segun ki House prosecutor Chel Diokno, an Section 8-A kan amended Anti-Money Laundering Act an nagmamawot na pugulan an unauthorized disclosure kan impormasyon asin dai dapat magsirbing blanket shield kontra sa subpoena kan impeachment court.
Naenot nang tinugutan kan impeachment court an paggamit kan AMLC records bilang ebidensya sa paglilitis. Nagdanay man si Senate impeachment court presiding officer Francis Escudero sa naenot na ruling, alagad tinugutan an hagad kan depensa na ibwelta an testimonya sa Oktubre 5 tanganing magkaigwa sinda nin supisyenteng oras para magpreparar.
Presente pa man giraray na nasa Article II kan impeachment case an usapin manungod sa sinasabing unexplained wealth asin mga deklarasyon sa Statement of Assets, Liabilities and Net Worth (SALN) kan ikaduwang pangulo.
Kaiba sa financial records na sinusuri kan prosecution an AMLC report na nagtutukoy sa tinatayang P6.7 bilyong aggregate transactions na inuugnay sa bank accounts nina Duterte asin sa agom kaining si Carpio. Sinabi kan prosecution na boot ninda ikumpara an mga transaksyon na ini sa declared income, assets asin iba pang financial interests kan mag-agom.
