Nakalangkaw na an red alert status kan Armed Force of the Philippines (AFP) dara kan mga nagpapadagos na hiro protesta sa manlaen-laen na parte kan metro manila katakod pa man sa pag-urulay sa mga katiwalian asin korapsiyon sa mga flood control projects.
Sa sarong entrevista, pigkumpirmar ni AFP Spokesperson Col. Francel Margareth Padilla na gabos kan saindang yunit sa Sandatahang Lakas an pawang mga naka-red alert status na puon pa sana kan nakalihis na Setyembre 12.
Ini an komo pagpepreparar kan saindang tropa na suportaran an Philippine National Police (PNP) sa pagmamantinir kan seguridad sa mga aktibidad kan mga progresibong grupo sa mga masunod pang aldaw.
Alagad maski an lakdang na ini an parte man kan saindang standard security measures kun enkaso man na maglala an sitwsyon, pigsierto ni Padila na mayong dapat ikahadit an publiko sa presenteng sitwasyon ngunyan kan mga rally.
Paliwanag pa ni Padilla, sa irarom kaini, igwang bastanteng numero kan mga personahes an itatalaga kan AFP komo standby forces para sa mga dae piglalaomang mga eventualities.
Mientrastanto, pigsierto man ni Padilla na an lakdang na ini kan Sandatahang Lakas an tanganing masierto na mamantinir an kaayusan asin katoninongan sa tahaw kan mga protestang ini.
