NAGA CITY- Pighihiling kan sarong konsehal sa siyudad nin Naga an pangangaipuhan sa mas mahigot na pag-implementar kan liquor ban.
Ini an makalihis an nairehistrong komosyon, pagsakat sa andas ni Ina Peñafrancia sa pigkundusir na Traslacion procession na nagpapahiling kan kawaran nin pagrespeto sa okasyon.
Sa entrevista kan Bombo Radyo Naga ki Atty. Areiz Macaraig, City Councilor, sinaysay kaini na dapat nang ibalik an kulungan para sa mga naka-inom tanganing ma-contain an mga ini sa sarong lugar asin dae na magkawsa pa nin dakulang problema siringman dae na makadanyar sa mga tawo asin deboto.
Pairalon soboot an pagrespeto sa selebrasyon asin likayan an pag-inom nin labi-labi komo pagpapahiling nin pakikisumaro sa mga aktibidad na pigsasagibo sa siyudad.
Sigun pa sa opisyal, dae magayon na role model sa mga kajovenan an ugaling pasikat sa panahon kan kasiributa, mayo man ining maitataong marhay sa sarong indibidwal.
Mientrastanto, naghagad naman nin tawad an saro sa mga nagsampa o nagsakat sa andas ni Ina kan nakalihis na Traslacion.
Narealisar soboot kaini an saiyang salang nagibo asin nagpromesa na dae na liwat pang mautro kan siring na gawi-gawi.
Sa nguyan, hagad na sana kan konsehal an liwat na kooperasyon kan publiko para sa ikukundusir na Fluvial Procession sa maabot na Sabado.
