Ipinagsugo ni Presidente Ferdinand Marcos Jr. an pagtutugdok nin “tent city” sa Bogo City, Cebu tangani paramientras maistaran kan mga residente na nawaran nin istaran huli sa 6.9-magnitude na linog.
Sa saiyang pagbisita sa Cebu, sinaysay kan Presidente na obheto kaining tawan nin salbado asin marikas na maiistaran an mga residente na natatakot bumalik sa mga naraot na establisyemento, kabali na an mga evacuation center.
Sigun sa Presidente, pwedeng gamiton an darakulang tolda gikan sa Philippine Red Cross na dating ginamit kan nakalihis na pandemya.
Sisiertuhon man na igwang pagkakan, malinig na tubig, kuryente, asin iba pang pangenot na serbisyo sa mga tent facility para sa mga apektadong pamilya.
Kasabay kaini, pigsierto kan Presidente na padagos an tabang asin suporta kan gobyerno para sa mga komunidad na tinamaan kan kalamidad hasta sa saindang ganap na pagbangon.
