GARO magin an Department of Health (DOH) an igwang sadiring “flood control version” makalihis ibuyagyag kan ahensiya na kadaklan sa mga health center na ipinatindog sa irarom kan health facilities enhancement program (HFEP) an nagtitinir na mayong pakinabang huli sa kakulangan nin personahes.
Sigun ki Akbayan Partylist Rep. Chel Diokno, igwang mala-flood control corruption sa DOH kaya kaipuhan mabusisi an saindang budget para sa masunod na taon.
Si Appropriations Committee Senior Vice Chairperson Rep. Albert Garcia an budget sponsor kan ahensiya.Nasa P320.5 billion an budget kan DOH para sa fiscal year 2026.
Pigdungan kan BARSc an pondo kan ahensiya nin P2.4 billion para sa pag kumpleto sa mga legacy hospitals, P150 million para sa children’s cancer treatment asin P60 billion para sa Philhealth basado sa nagin direktiba ni Presidente Ferdinand Marcos Jr.
Nakapalaog sa pondo an health insurance, medical assistance,cancer funds, health facilities urgent care centers asin support for health workers.
Sa budget deliberation, kinuwestiyon ni Diokno kun tano 200 sana sa 600 healthh center na ipinatindog sa irarom kan Health Facilities Enhancement Program (HFEP) an naggagana sa ibong kan pagtatagama nin labi P170 bilyon para sa imprastraktura asin kagamitan kaini kan nakalihis na dekada.
Kinuwestiyon man ni ML Partylist Rep. Leila de Lima an milyun-milyong kantidad kan mga pa-expire ng mental health drugs na binagsak soboot ni Secretary Ted Herbosa sa pribadong organisasyon na Rotary Club of Quezon City Circle.
Kan haputon an ahensiya, dae soboot sinda aware na nangyari an delivery sa ibong kan surat kan Rotary Club na ipigbweltada ninda an mental health drugs huli ta dae soboot ninda ini pig-request sa DOH.
Sa ibong kan budget hearin kan executive department, nakua pa soboot ni Herbosa na mag-out of the country pa -Boston asin New York sa Amerika.
Sigun sa mga source sa DOH, piglilikayan asin dae na soboot naiimbitaran si Health Secretary Ted Herbosa sa official functions na pigdaos kan Department of Health (DOH) huli sa mga alegasyon na katiwalian na nangyari sa laog kan ahensiya puon kan magtukaw ini komo sekretaryo.
Sigun man ki Baguio City Mayor Benjamin Magalong, nakapila na an DOH sa radar kan mga anti-corruption advocates tanganing maimbestigaran huli sa patong-patong na iregularidad asin corruption complaints sa ahensiya sa pangengenot ni Herbosa asin lima pang opisyal kaini.
Risa soboot na mayong pigsusunod na due process an sekretaryo sa nagkapirang transaksiyong piglalaog kaini para sa saiyang departamento.
Mainit na man soboot si Herbosa sa Palasyo makalihis mapag-aramang pig-name drop kaini si First Lady Lisa Marcos.
