Pormal nang mabutas si Senate President Pro Tempore Panfilo Lacson komo Senate Blue Ribbon Committee Chairman na iyong nagtututok sa mga maanomalyang flood control projects sa nasyon.
Sa sarong pahayag, ipinaliwanag ni Lacson na an saiyang desisyon an basado na man sa saiyang mga nadadangog na komento gikan sa saiyang mga kaibahan sa senado asin pagaalinlangan man kan mga ini sa saiyang pamamayo sa komite.
Huli man soboot ta gabos kan mga tagapamayo kan mga komite an pig-elehir kan saindang mga kaibahan, masiber soboot si Lacson basado sa kamawotan kan saiyang kapwa senador.
Kun kadakol na an nagpahayag nin pagkadismaya sa sakun pano kaini papamayuhan an komite, ini na soboot an oras tanganing magbutas na asin itao sa ibang miyembro kan senado na sa hiling ninda kayang kaputan an pagdangog nin mas marhay.
Hurot pa kaini, mayong anu man na kritisismo gikan sa mga netizens asin magin gikan sa partisan sectors an pwedeng makaulang o makaipit sa saiya na gibuhon an saiyang trabaho komo chairperson kan komite, alagad kun sadiri kaining mga kaibahan an nagpupuon na man na magtaram sa saiyang pamamayo, mas marhay na soboot na maghali na sana.
Mientrastanto, sa ibong man kan mga pahayag na ini, nanindugan si Lacson na dae digde natatapos an saiyang trabaho na labanan an katiwalian asin korapsiyon gikan sa bulok na sistema asin pang-aabuso sa ponso kan taumbayan.
