NAGA CITY – Pigpapaimbestigaran na kan alkalde kan syudad nin Naga an nasa likod kan mapangraot na pagpost sa social media dapit sa pagkua soboot kan sarong empleyado kan City Hall sa carnival nin nasa 350-k na kantidad.
Sa nagin paghampang sa mga kagawad kan media ni Naga City Mayor Leni Robredo, sinaysay kaini na sa enot dae soboot kaini aram an dapit sa nasambitan ng post kan sarong account.
Alagad sigun ki Robredo an mga siring na insidente kaipuhan na iagi sa higher standard integrity asin mayong exemption an siisay man. Pigpaliwanag man kan opisyal na pinag-adalan kan magkakanigong opisina an proseso kan carnival antes na magtugdok an mga ini.
Kun kaya kan nakalihis na Agosto pighagad kan alkalde an transcript huli ta nahiling kaini na nagpupuon nang magbugtak nin carnival. Pigdumanan soboot ini kan PSO asin napag-araman na nag-aapply pa sana man para digde.
Nagrequest soboot an mga ini nin saro asin may kabangang bulan alagad nagtao man nin impormasyon an sarong empleyado na pupwede sanang tugutan an operasyon kan carnival puon September 1 hasta September 30.
Dugang pa kan alkalde an nagluluwas kaya ngunyan na impormasyon sa social media pigtugaan soboot an saro asin may kabangang bulan na request kan mga taga carnival para sa saindang operasyon na baliktad sa impormasyon na ipinaluwas kan City Hall.
Sa ngunyan, pigsaysay na sana kan alkalde na mas marhay na iagi na sana ini sa imbestigasyon tanganing maaraman kun ano an katotoohan.
