Hinatulang guilty kan International Criminal Court (ICC) si Ali Muhammad Ali Abd-Al-Rahman, mas bistado komo Ali Kushayb, sa 27 kaso kan war crimes asin crimes against humanity katakod kan mahewasang kadahasan sa Darfur, Sudan puon Agosto 2003 hasta Abril 2004.
Si Kushayb an dating halangkaw na opisyal kan Janjaweed, sarong armadong grupong pigsusuportaran kan gobyerno kan Sudan na bistadong imbwelto sa brutal na kampanya kontra sa mga rebeldeng grupo kan Darfur.
An giyera nagpuon kan taong-2003 kan mag-alsa an mga grupong etnikong African kontra sa Arab-dominated na gobyerno kan Khartoum.
Komo kasimbagan, piglunsar kan gobyerno an sarong scorched-earth campaign na pigbibilog kan aerial bombings asin pag-atake kan Janjaweed sa mga komunidad.
Sigun sa ICC, si Kushayb an bako sanang nagsugo kan mga pag-atake kundi personal na nakibali sa mga paggadan, panlulugos, asin pag-torture.
Saro sa mga testigo an nagsabong si Kushayb an saiyang mga personahes na uutruhon soboot an pag-atake tanganing masiertong mayong makakasalbar.
Kaibahan sa mga krimen na pigsunad iyo an murder, rape, torture, prosecution, asin forcible transfer of population.
Saro ini sa mga enot na hatol kan ICC katakod kan Darfur conflict asin enot na conviction para sa gender-based persecution sa historya kan korte.
Sinayumahan kan ICC an depensa ni Kushayb na “mistaken identity” asin binisto ining aktwal na si Ali Kushayb.
An hatol, ibinaba sa panahon kun kasuarin liwat naglala an kadahasan sa Sudan, partikularmente na sa Darfur, huli sa sagupaan kan Sudanese Army asin Rapid Support Forces (RSF), sarong grupong nag-ugat mismo sa Janjaweed.
