Pigsierto ni Presidente Ferdinand Marcos Jr. na mayong puwang sa nasyon an iresponsableng pagmimina, kasabay kan saiyang pangapudan para sa sarong responsible, inclusive, asin climate-resilient mining industry sa Pilipinas.
Sa saiyang patara-tara sa pagbubukas kan Mining Philippines 2025 International Conference and Exhibition sa Taguig, sinaysay kan Presidente na importanteng mamantinir an balanse sa pag-ultanan kan paglago kan ekonomiya asin pangangataman sa kalikasan.
Hurot pa kan Punong Ehekutibo, an pagmimina an dapat magkawsa nin tunay na benepisyo sa mga kahimanwa, siring na sana kan pagpapatugdok nin mga eskwelahan, ospital, asin mga tinampo na makonektar kan mga komunidad sa mga oportunidad.
Pigtawang-duon man kan Presidente an pagpapakusog kan transparency asin accountability sa sektor tangani masierto na napakikinabangan kan taumbayan an yaman gikan sa likas na pinagkukuanan.
Kabali sa mga lakdang kan administrasyon an pagpapautob nin Enhanced Fiscal Regime for Large-Scale Metallic Mining Act para sa patas asin malinaw na buwis sa industriya, asin Philippine Ecosystem and Natural Capital Accounting System Act na obhetong masukol asin mapangatamanan an likas na yaman kan nasyon.
Sigun ki Presidente Marcos, obheto kan mga repormang ini na pakusugon an tiwala kan publiko asin mga mamumuhunan, mantang sinisiguro na an pagmimina sa nasyon an magigin modelo kan kasaganaan asin panghaluyang kaunladan.
Ipiunto ni Presidente Marcos gabos nin operasyon sa pagmimina sa nasyon an dapat alinsunod sa mga promisang pangkalikasan kan Pilipinas, kabali na an Paris Agreement at Philippine Energy Plan.
Obheto kan mga panundunang ini na siertuhon an kaunladan kan sektor kan enerhiya asin pagmimina nin dae pigsasakripisyo an kalikasan.
