NAGA CITY- Pigsunad kan sarong konsehal sa siyudad nin Naga an ordinansa dapit sa responsible pet ownership komo kasimbagan sa nagdadakol na basay-basay na hayop sa tinampo.
Susog kaya sa datos kan City Veterinary Office kan siyudad, igwang poco mas o menos 25-K na atamang Ido asin Ikos an yaon sa Naga City.
Kun saen basado man sa datos kan Naga City General Hospital, nag-abot na sa labi 4-K na animal bites puon Enero hasta Hunyo an nairehistro.
Sa pigbubusol na ordinansang Responsible Pet Ownership nakapalaman digde an pagpabakuna, pagparehistro asin pagbugtak nin micro chip sa mga Ido asin Ikos.
Kasimbagan soboot ini sa nagdadakol na kaso kan rabies o helang na nakukua sa kagat o kamros kan Ikos asin Ido.
Siringman malilikayan kaini an mga nagkapira pang problema na dara kan mga basay-basay na hayop siring kan aksidente sa tinampo asin mabatong parong.
Marurumduman, padagos an pagpapagirumdom kan lokal na gobierno kan siyudad nin Naga sa paagi kan City Veterinary Office na pirmeng magin responsable an mga pet owners sa saindang mga ataman tanganing dae paggikanan kan kadakol na mga problema.
Sa ngunyan, hagad na sana kan nasambitan ng opisina an pakikipagtabangan kan publiko para sa pagsimbag sa problema.
