Pig-iimbestigaran ngunyan kan Department of the Interior and Local Government (DILG) an nagkapirang alkalde asin lokal na opisyal sa Cebu na nagbiyahe pasiring Europa mantang padagos na pigtatamaan kan Bagyong Tino an probinsiya na nagdara nin matinding danyos asin naggadan nin labi gatos na buhay.
Sigun ki Assistant Provincial Administrator Aldwen Empaces, sinugo kan DILG Central office an Kapitolyo kan Cebu na magsumiter nin mga travel order asin kaukulang dokumento tanganing maaraman kun igwang legal na basehan an mga biyahe kan nasambitan ng mga opisyal.
Kaibahan sa mga natawan ni Gov. Pamela Baricuatro kan Foreign Travel Authority (FTA) an pitong alkalde gikan sa manlaen-laen na banwaan sa Cebu, pati na man si Provincial Board Member Andrei Duterte.
Nilinaw ni Gobernadora Baricuatro na an mga travel authority an napirmahan antes pa man magtama an bagyo asin iba pang kalamidad sa rehiyon.
Mientrastanto, si Tourism Secretary Christina Garcia Frasco an nasa London kan nakalihis na Nobyembre 4 komo pamayo kan delegasyon kan Pilipinas sa World Travel Market.
Kan mabaretaan an sakuna, tulos soboot ining nagpuli sa nasyon kaibahan an saiyang agom, si 5th District Representative Duke Frasco, tanganing pangenotan an relief operations sa Cebu.
