NAGA CITY- Pig-orgulyo kan Magarao Municipal Police Station an saindang nakuang pagbisto gikan sa Department of the Interior and Local Government.
Sigun ki PCpt. Mark Navarrozo Spaña an Officer-In-Charge kan Magarao MPS, an nasambitan ng award an para sa High functionality sa Municipal Anti-drug Council.
Paliwanag kan opisyal, sainda an saro sa napili kan DILG Camarines Sur na pigtao kan nakalihis na Nobyembre 19, 2025.
Katakod digde, an nasambitan ng pagbisto an produkto kan pagtatarabangan kan lokal na gobierno kan banwaan nin Magarao na pinamamayuhan kan saindang alkade, DILG, PNP asin kan 15 mga Punong Barangay kan saindang banwaan.
Apwera pa digde, an pagbisto na saindang naipuli an bunga man kan saindang mga aktibidad na pigkukundusir tanganing labanan an iligal na droga.
Marurumduman, kan nakalihis na Marso 18, 2023 pigdeklarar na drug cleared municipality an banwaan nin Magarao alagad sa ibong kaini padagos man an trainings asin seminars na pigsasagibo partikular sa mga Barangay, asin eskwelahan dapit sa iligal an droga.
Dakula man an pigtagama na pondo na mas nakakatabang tanganing makabilog nin mga aktibidad orog na sa mga Symposium sa mga kajovenan sa 15 barangay.
Sa ngunyan, pigsierto kan opisyal na padagos an saindang pigkukundusir na anti-criminality campaign tanganing mamantinir an paz y orden sa saindang lugar.
