Pinahimutikan kan abogado ni dating Presidente Rodrigo Duterte an naglalakop na bareta sa internet na nanutaran soboot na mayong pagmangno an dating Presidente sa laog kan saiyang kulungan sa detention facility kan International Criminal Court (ICC) sa The Hague, Netherlands.
Sigun ki Nicholas Kaufman, basado sa mensaheng ipinadara ni Vice President Sara Duterte, mayong katotoohan an nagluwas na report.
Sinaysa man kan lead counsel na nakaulay kaini mismo an dating Presidente asin nasa marhay ining kamugtakan.
Dugang pa ni Kaufman, matatag na naghahalat an dating Presidente sa magigin desisyon kan ICC Appeals Chamber katakod ka saiyang kahagadan na interim release o paramientras na paglaya.
Piglalaomang iluluwas kan ICC Appeals Chamber an desisyon sa apelar kan dating Presidente dapit sa pagsayuma kan saiyang interim release sa aldaw nin Biyernes, Nobyembre 28.
Sigun sa ICC, an ruling an ihahayag sa open court alas-10:30 nin aga, oras sa The Hague, asin ibo-broadcast nin live sa saindang official website, Facebook page, asin Youtube channel.
Marurumdumang kan nakalihis an Setyembre 26, ibinasura kan ICC Pre-Trial Chamber I an kahagadan ni dating Presidente Duterte para sa paramientras na pagpapalibre sa saiya.
